Veiði.

23.5.2008 | 15:26

Hafið þið skoðað það hvað verð á veiðileyfum er orðið hátt? Þá er ég að tala um lax- og silungsveiði í ám. Ég hef, í félagi við góða vini, stundað stangveiði til margra ára. Við erum fjórir félagar sem höfum haft þann háttinn á að leggja ákveðna upphæð inn á bankabók. Síðan höfum við fengið okkur veiðileyfi þegar sala leyfa byrjar. Þetta hefur verið þægilegt fyrirkomulag og gefist vel. Við skráðum okkur í SVFR, borguðum þar félagsgjöld og sóttum þar um leyfi. Einnig versluðum við beint við Ragnar bónda í Víðidalnum, en hann seldi okkur leyfi í Víðidalsá á silungasvæðið.

Ég man að við byrjuðum á þessu fyrir um tíu árum síðan. Þá gátum við fengið tvo daga í Víðidal ásamt því að fá tvo daga í Hítará II og Krossá. Eitt sumarið bættum við fjórðu ánni við, Stóru Laxá í Hreppum og annað sumarið var Laugardalsá fjórða áin. Þetta gátum við þá og vorum alsælir með þetta.

Í dag förum við ekki lengur í laxveiði og við sögðum okkur úr SVFR. Hækkun leyfa spilar líka inn í þetta, en að fara í veiði er svipað og að fara til útlanda í hálfan mánuð. Skrítið að á tíu árum er hækkunin orðin svo mikil að það er aðeins á færi þeirra ríku og efnameiri að fara að veiða.

Ég hef á tilfinningunni að laxveiði eigi að vera svona “yfirstéttar eitthvað”. Þeir sem hafa ekki efni á þessum munaði í dag halda að sér höndum og bíða. Ég vona að verðið á leyfunum komi til með að lækka, þannig að maður upplifi skjálftann og spennuna þegar vorið færist yfir landið. Þá er tilhlökkunin alveg að fara með mann og maður bíður eftir því að veiðidagurinn renni upp. Þetta er fyrsta árið sem ég upplifi ekki þessa tilfinningu og ég horfi hnugginn á veiðidótið mitt inni í bílskúr.

Í þau skipti sem ég kem suður í sumar, þá mun ég taka með veiðidótið og reyna að veiða í Þingvallavatni. Foreldrar mínir eiga sumarbústað í Borgarfirði og þaðan er stutt að fara í Hreðavatn, sem er skammt frá Hreðavatnsskála. Það vatn þekki ég reyndar ágætlega, fór þangað oft í gamladaga með karli föður mínum, sem er með veiðidellu á svipuðu stigi og ég. Þá fórum við saman og keyptum veiðileyfi á bænum Hreðavatn. Ég fór í Hreðavatnið s.l. sumar, nú með yngstu dóttur minni og gaman að segja frá því að vatnið kom á óvart. Í gamla daga var oft góð veiði en síðan datt hún niður til margra ára, alveg niður í ekki neitt og því fækkaði ferðum þangað. Það var meira svona að reyna að upplifa æskuna og gamla tíma, sem ég tók stelpuna með mér s.l. sumar og renndi í vatnið. Átti frábæran tíma með stelpunni, gott veður og góð veiði. Það viðurkennist að við gleymdum okkur í veiðinni og veiddum of lengi, til rúmlega miðnættis. En veðrið var svo gott, logn, fluga að pirra mann og við í fiski. Eins hefur okkur feðgum langað að veiða í Langavatni en ekki látið verða að því. Er ekki bara kominn tími á að renna þangað í sumar?